من نحن

كتبه م. أيمن لجعبة — مهندس ومؤسس كيت بوكس · آخر تحديث ٧ أيلول ٢٠٢٦

كيت بوكس مركز صيانة أجهزة منزلية بعمّان، شغّال من عشر سنوات. بنصلّح غسالات وثلاجات ونشافات ومكيفات وجلايات وغازات وفريزرات — بالبيت، وبالمؤسسات، وبأي منشأة فيها أجهزة منزلية.

الفريق — مش فني لحاله

هاد أكثر شي بيفرقنا عملياً. فريق كيت بوكس فيه:

• مهندس كهرباء — للوحات الإلكترونية والحسّاسات وأنظمة التحكّم
• مهندس ميكانيك — للحلّة والبيليا والأجزاء المتحرّكة
• فني تبريد — للثلاجات والفريزرات والمكيفات ودوائر التبريد
• مساعدون — للتركيب والنقل والأعمال المساندة

الأجهزة الحديثة صارت تجمع أكثر من اختصاص بجهاز واحد. غسالة LG فيها موتور درايف مباشر بحساس موقع (كهرباء) وحلّة على رمان بلي (ميكانيك). ثلاجة سامسونج فيها دائرة تبريد (تبريد) وثلاث لوحات تحكّم (كهرباء). فني واحد بيغطي جزء من الصورة بس.

شو بيقول عملاؤنا

★★★★★ ٥٫٠ من ٥ على جوجل من ١٩ تقييماً · اقرأها كلها

شوف شغلنا بالفيديو على قناتنا على يوتيوب — تنظيف بالبخار، فلاتر المضخة، وكلس مي عمّان من جوّا الغسالة. وموجودين كمان على السوق المفتوح وخرائط جوجل.

تجربتي معاهم كانت رائعة. المهندس أيمن شاطر ومحترف ومواعيده دقيقة، وتعاملت معه أكثر من مرة وكل مرة كان التصليح سريع ومرتب، والأهم انه بعرف شغله وبحدد المشكلة ويحلها بدون لف ودوران. الخدمة ممتازة والأسعار مناسبة.

خدمه ممتازة وبأسعار معقوله. سرعه بالاستجابة وخدمه منزليه ممتازه مع إعطاء ضمانه على أي قطعه جديده يتم تركيبها.

كيف بنشتغل

1. بتحكيلنا العطل. نوع الجهاز، الماركة، الموديل إذا بتعرفه، والرمز على الشاشة إذا في. كل ما زادت المعلومات، زادت فرصة إنه الفني يجي ومعه القطعة الصح من أول زيارة.
2. بنحدّد موعد. السبت للخميس، ١٠ صباحاً – ٦ مساءً. الجمعة مغلق.
3. الفني بيفحص قدّامك. مش بغرفة تانية ولا بالسيارة — قدّامك، وبيشرحلك شو لاقى.
4. بنقلّك التكلفة قبل ما نبلّش. ما في مفاجآت بالفاتورة.
5. بنصلّح بنفس الزيارة إذا القطعة بمخزننا.
6. بتستلم ضمان على القطعة من ٦ أشهر لسنة.

الأسعار والضمان — بوضوح قبل ما نبلّش

موقفنا من الإصلاح مقابل التبديل

في حالات بتكون تكلفة الإصلاح فيها قريبة من سعر جهاز جديد — كمبروسر على ثلاجة قديمة، أو رمان بلي مع موتور على غسالة تجاوزت عمرها.

بهاي الحالات بنقلّك، وبتقرّر إنت. رسوم الفحص بتظل مستحقّة لأنه التشخيص خدمة بحد ذاته — بس ما رح ندفعك لإصلاح إحنا نفسنا ما نشوفه مجدي. كتبنا دليل كامل لهاد القرار.

القطع اللي بنركّبها

القطع جديدة ومختارة بعناية لتطابق القطعة الأصلية، وبيختارها المهندس المسؤول على أساس المواصفات الفعلية — القياس والجهد والمقاومة وطريقة التثبيت. إمّا أصلية من الشركة المصنّعة، أو طبق الأصل من شركات أخرى مطابقة بالمواصفات.

الضمان لا يقل عن ٦ أشهر ولا يزيد عن سنة حسب نوع القطعة، وهاد التزام منّا مش من الوكيل.

وين بنخدم

جميع مناطق عمّان بخدمة منزلية. أسرع وصول حقّقناه كان خلال ساعة من الطلب، وما تأخّرنا على أي عميل أكثر من ٤٨ ساعة لحد الآن.

شوف كل مناطق الخدمة ←

الاسم والهوية

كيت بوكس (Kit Box) هو الاسم التجاري اللي بنشتغل فيه. الاسم المسجّل رسمياً: مؤسسة أيمن لجعبة لصيانة الأجهزة الكهربائية.

كيت بوكس مركز صيانة مستقل — مش تابع لأي شركة مصنّعة ولا وكيل معتمد. بنصلّح أجهزة LG وسامسونج ودايوو وغيرها، وأسماء هالماركات ملك لأصحابها ومنذكرها فقط لوصف الأجهزة اللي بنقدّم لها خدمة.

ولما تتواصل معنا، بنجمع بس اللي بنحتاجه لنرتّب الزيارة — رقمك ووصف العطل والعنوان. شو منعمل فيها وشو ما منعمله مكتوب بـسياسة الخصوصية.

خدمة الطوارئ — ٢٤ ساعة، ٧ أيام بالأسبوع

بنستقبل حالات الطوارئ على مدار الساعة طوال أيام الأسبوع، بما فيها الجمعة. ورسوم الفحص هي نفسها — ما في زيادة على الطوارئ ولا على الليل ولا على العطل.

وشو بيعتبر طارئ؟ إنت بتقرّر. ثلاجة مليانة أكل وقفت بالليل طارئ. تسريب مي من الغسالة طارئ. ريحة غاز طارئ فوري. وإذا بدك فني اليوم لأي سبب، اتصل وبنشوف شو بنقدر نعمل.

بنخدم كمان العملاء الأجانب

في الفريق مين بيتواصل بالإنجليزي، فإذا كنت مقيم أجنبي أو بتشتغل مع طاقم غير عربي، ما في مشكلة بالتفاهم — لا بالحجز ولا وقت الزيارة.