كم سعر صيانة الغسالة أو الثلاجة أو الغاز أو المكيف في عمّان؟

راجعه م. أيمن الجعبة — مهندس ومؤسس كيت بوكس · آخر تحديث ٩ تشرين الأول ٢٠٢٦

السؤال الأول اللي بيوصلنا على الواتساب: «قدّيش بتكلّف؟». الجواب الصريح إنه في جزء ثابت بتعرفه من الآن، وجزء بيعتمد على العطل وبتعرفه قبل ما نبلّش الشغل — مش بعده. هاي الصفحة بتشرح الاثنين بدون تجميل.

١. رسوم الفحص والتشخيص — ١٥ ديناراً

الفني بيوصل، بيفحص الجهاز، وبيحدّدلك العطل والقطعة (إذا في قطعة) وكم رح يكلّف الإصلاح. هاي الخدمة لحالها إلها رسوم: ١٥ ديناراً داخل عمّان، و٢٥ ديناراً بالزرقاء ومادبا والسلط بسبب المسافة. بتنحسب عند الوصول، سواء قرّرت تكمّل الإصلاح أو لأ — لأنه التشخيص الصح بحد ذاته هو اللي بيوفّر عليك تجرّب قطع على الفاضي.

وإذا كمّلت الإصلاح معنا، الـ ١٥ دينار (والـ ٢٥ خارج عمّان) بتنخصم من أجور الشغل — بتصير جزء من الأجرة، مش رسوم فوقها. يعني اللي بتدفعه بالآخر: أجور الشغل + القطعة إذا في قطعة.

وإذا طلع العطل بسيط وانصلّح بالزيارة نفسها بدون قطعة — تنظيف، ضبط، وصلة مرتخية — الـ ١٥ دينار (أو الـ ٢٥ خارج عمّان) هي كل اللي بتدفعه.

٢. أجور الشغل — من ١٥ إلى ٥٠ ديناراً

هاد الجزء اللي بيتغيّر حسب العطل، ورسوم الفحص محسوبة ضمنه مش فوقه. داخل عمّان الأجرة من ١٥ إلى ٥٠ ديناراً؛ وبالزرقاء ومادبا والسلط أقل أجرة ٢٥ ديناراً (قدّ رسوم الفحص هناك) والحد الأعلى نفسه ٥٠. ثلاث أشياء بتحدّده:

• الوقت والجهد: تبديل قفل باب غسالة نص ساعة، تبديل رمان بلي فكّ كامل للحلّة.
• الصعوبة: جهاز مدمج داخل خزانة، أو مكيف وحدته الخارجية بمكان صعب الوصول، بياخد وقت أطول.
• النقل للورشة: بعض الأعطال (البيليا، الحلّة، اللحام) ما بتتصلّح بالبيت. وقتها بنحمل الجهاز وبنرجّعه، وهاد بيدخل بأجور الشغل.

عملياً، الأعطال بتنقسم لثلاث فئات: بسيطة (فلتر، قفل باب، إبرة أمان، كباستور، وصلة) — وقتها الأجرة بأول المدى؛ متوسطة (مضخة، سخّان، مروحة، لوحة تحكّم) — بالنص؛ وبدّها ورشة (رمان بلي، حلّة، كمبروسر) — بآخر المدى مع النقل. الفني بيقلّك الفئة والرقم قبل ما يبدأ.

٣. القطع — بسعرها، وبتعرفه قبل التركيب

أسعار أكثر قطع الغسالات شيوعاً (المضخة، السخان، الجوان، الرولمان بلي) موجودة بجدول واحد على صفحة صيانة الغسالات. ولأصحاب أجهزة كاندي، رموز الأعطال وقطعها الشائعة على صفحة صيانة كاندي. ما بنربح من القطعة، بنربح من الشغل. القطع من مخزننا، جديدة، إمّا أصلية أو مطابقة بالمواصفات، وبيختارها المهندس المسؤول. سعر القطعة بينقال قبل التركيب — وإذا شفته ما بيستاهل مقارنة بعمر الجهاز، بتقدر ترفض وبتدفع رسوم الفحص بس.

ليش ما بنكتب سعر كل قطعة هون؟ لأنه نفس القطعة بتختلف بين ماركة وموديل وسنة صنع، والرقم اللي بنكتبه اليوم بيصير غلط بعد شهر. الرقم الصح بتاخده على التلفون لما تحكيلنا الموديل والعطل، أو بالزيارة.

٤. شو ما بيتغيّر: الطوارئ والليل والعطل

ما في زيادة على الطوارئ ولا على الليل ولا على الجمعة. نفس الـ ١٥ دينار، ونفس أجور الشغل. الشي الوحيد اللي بيتغيّر خارج عمّان هو رسوم الفحص (٢٥ بدل ١٥)، وبالتالي أقل أجرة شغل (٢٥ بدل ١٥) — الحد الأعلى للأجرة والقطع والضمان نفسها تماماً.

٥. ليش ما بنحكي رقم نهائي على التلفون؟

لأنه نفس العرض بيطلع من قطع مختلفة. «الغسالة ما بتصرّف» (شوف صفحة صيانة غسالات في عمّان) ممكن تكون فلتر مسدود (١٥ دينار وخلص)، أو خرطوم، أو مضخة، أو حساس ضغط — وكل وحدة إلها رقم مختلف. وحتى رمز الخطأ على الشاشة بيقلّك وين المشكلة مش شو القطعة — اقرأ دليل رموز الأخطاء. اللي بنقدر نحكيه على التلفون هو المدى المتوقّع، والرقم بعد الفحص.

٦. متى الإصلاح ما بيستاهل — وبنقلّك

إذا كلفة الإصلاح قرّبت من نص سعر جهاز جديد، أو الجهاز عمره كبير وهاد ثالث عطل بسنة، بنقلّك بصراحة إنه ما بيستاهل. بتدفع رسوم الفحص وبتوفّر الباقي. القاعدة كاملة بـأصلّح الجهاز ولا أشتري جديد؟.

٧. كيف تقلّل الفاتورة

1. احكيلنا الماركة والموديل (على ملصق داخل الباب أو ورا الجهاز) والرمز إذا في — الفني بيجي ومعه القطعة الصح من أول زيارة.
2. ما تكمّل تشغيل جهاز فيه صوت غريب أو تسريب — العطل الصغير بيصير كبير.
3. جرّب الفحوصات البسيطة بالمدوّنة أولاً: فلاتر، جوان، توزيع الغسيل. كثير أعطال بتنحلّ بدون زيارة.
4. إذا عندك أكثر من جهاز فيه مشكلة، احكيلنا من البداية عشان نجيب القطع المحتملة معنا.

طرق الدفع

كاش أو تحويل بنكي، بعد انتهاء الشغل.

الأسعار والأعطال حسب الجهاز

كل صفحة جهاز فيها أعطاله الشائعة وشو بيتغيّر فيها عادةً: الغسالات · الثلاجات · المكيفات · الجلايات · الغازات والأفران · النشافات · الفريزرات.

أسئلة شائعة